అందుకోండి మరో పువ్వు
రచన : గుండ్లపల్లి రాజేంద్రప్రసాద్
మనసులో ఆలోచనల ప్రవాహంలా
కొండలనుండి జారిపడేజలపాతాలను చూస్తా
నదిలోకలిసి ముందుకుసాగే నీటిని తీసుకుంటా
పూలమొక్కలకుపోసి దాహం తీరుస్తా
నీలిమబ్బులక్రింద కూర్చుంటా
నింగిలో కదిలే నల్లనిమేఘాలను చూస్తా
వినువీధినుండి కురిసే వానజల్లులలో తడుస్తా
వాలుచేసి నీటిని పూలచేట్లకు పారిస్తా
చెట్టునీడలో విశ్రాంతి తీసుకుంటా
గూళ్ళుచేరే పక్షులను చూస్తా
గూటినున్న పక్షిపిల్లలు కేరింతలు వింటా
ప్రక్కనున్న పూలమొక్కల పోషణచూస్తా
పెరిగిన పూలతోటలో విహరిస్తా
పలురంగుల పూలను పరికిస్తా
పరిమళాలను తనివితీరా ఆఘ్రానిస్తా
పూలకన్యలను పరవశింపజేస్తా
అక్షరకుసుమాలను అందంగా అమరుస్తా
పదపుష్పాలను ప్రాసలతో ప్రయోగిస్తా
పూలభావాలను బాగా బహిరంగ పరుస్తా
పూలమనసులను ముచ్చటగా పరిచయంచేస్తా
పగలు సూర్యకాంతిలో
పువ్వులా ప్రకాశిస్తా
వెన్నెలరేయిలో
విరబూసినవిరిలా వెలిగిపొతా
కళ్ళముందు
కవితాపుష్పాన్ని
మెరిపిస్తా
మురిపిస్తా
మనసులను
మీటుతా
హృదయాలలో
మాటేస్తా
ఆత్మను పుష్పంలా
వికసింపచేయిస్తా
అంతరంగాన్ని
పరిమళములాచల్లేస్తా
కవిమనసును
కనుక్కోండి
కవితోకలసి
కదలండి
చదువరులచెంతకు చేరుతా
అందాలనుఆరబోసి ఆనందపరుస్తా
మరోపువ్వును అందిస్తా
మనసులను కదిలిస్తా
అందుకోండి మరోపుష్పాన్ని
అందాన్ని ఆస్వాదించండి
ఆనందాన్ని అనుభవించండి
ఆలోచనలను పారించండి