బాల్యవివాహం
రచయిత్రి – అలేఖ్య రవికాంతి
అందాల అపరంజి
పేదింటి మాలచ్చిమి
తన తొమ్మిదేండ్లకే
తొంబై వరహాలకి అమ్ముడైనాది
మచ్చటగా ముస్తాబై
మండపాన కూర్చుంది
వరుడేమో పండు ముసలి
సొగసరిని చూచి మురిసి
ముక్కుపచ్చలారని పసిదాని మెడలోన పుస్తె కట్టి తన గొంతుకోసినాడు
తీరా ఓ నెల కూడా నిండకుండానే
కాళ్ళ పారాణి ఆరాక ముందే
పుస్తె కట్టినోడు పాడె ఎక్కినాడు
అపరంజి జీవితాన్ని
బుగ్గిపాలు చేసినాడు
బాల్యవివాహమే అపరంజి పాలిట యమపాశమైంది
తన నిండు యవ్వనమంతా
అడవి కాసిన వెన్నెలలా శూన్యంగా మారింది!!