★ బాపూజీ ★
అడుగడుగడుగో
అతడే అతడే!
అర్ధనగ్నంగా ఉన్నాడే
అంగవస్త్రంతో
నీలా బోసినవ్వు
పాలలా పోస్తున్నాడే
వెన్నెలంతా నోట నింపుకుని…
రివటలా వున్నాడు చూడు
గట్టిగా గాలి వీస్తే
ఎగిరిపోతాడేమో కదా
అందుకే కర్ర పట్టుకున్నాడేమో!
ఆ బొమికెల గూడులో
ఎంత తేజమో గదా!
మిట్ట మధ్యాహ్నపు మార్తాండునిలా
ఆ గుండూ,ఆ సోడాబుడ్డి అద్దాలు
అతడేరా చిన్నా అతడే
ఆంగ్లేయులకు బెదురు పుట్టించాడు
బ్రిటీషువారిని గెంటివేశాడు
యుద్ధం చేసి.కాదు నాన్నా
అణుబాంబు కన్నా భయంకరమైన
శాంతి మంత్రంతో!
అహింసా వాదంతో
అలాటి వాడు ఈ భూమిపైనే
తిరిగాడంటే ఆశ్చర్యంగా లేదూ!
రచన :: ప్రసాదరావు రామాయణం