కరోనా విలయ తాండవము
రచయిత :: డా.అడిగొప్పుల సదయ్య
జడలు విప్పెనుకదా జగతిపై విషక్రిమి
విస్ఫులింగములవల విసరి యూపిరి తీయ
శ్వాసకోశములపై పాశసర్పము చుట్టి
మహిషవాహనుడల్లె మహిని విజృంభించె
ముళ్ళ నాలిక జాపి మెల్లగా మనుజులను
కాలగర్భములోకి కలుపుతూపోతోంది
ప్రాణవాయువు నాపి ప్రాణముల హరియిస్తు
పసిడి తరువులలోటు పరిహసించుతు చెప్పె
ముక్కు మూతుల రెండు మూసి మాస్కుల తొడుగు
కరములను గడిగడికి కడిగి లేపనమద్దు
కళ్ళనూ, ముక్కునూ కలియతిప్పకు నెపుడు
కాచుకొని కూచుండె కరోనా వాటిలో
ఆరునడుగుల దూరమవలంబనము చేసి
విషవాయు వలయమును విరిగేట్లుజేయాలి
భద్రతలు పాటించ పారిపోవును క్రిమి
మన బతుకు కలదిపుడు మన చేతనే సుమి..!