కుసుమ కదంబాలు

కుసుమ కదంబాలు

రచన: గుండ్లపల్లి రాజేంద్రప్రసాద్

రకరకముల పూలు
రంగురంగుల పూలు
రమణులకు రమ్యమిచ్చు
రసికులను రంజింపచేయు

పుష్ప వనమాలులు
పుష్ప లావికలు
పుష్ప ప్రేమికులు
పుష్ప సేవకులు ధన్యులు

పూల బాటల నడక
పూల జల్లుల మునక
పూల నవ్వుల కానుక
పూర్వ పుణ్యాలు ఫలాలు

పల్లవించిన పొదలు
పూచిన పలుపువ్వులు
పరిమళించిన ప్రసూనాలు
పరికించువారికి ప్రమోదాలు

పుడమితల్లి పిల్లలు పూలమొక్కలు
మొక్కలకు పెరుగు కొమ్మలు
కొమ్మలకు పూచు పువ్వులు
కలసి కళ్ళకిచ్చు కమ్మదనాలు

సన్నగా వీచే చల్లగాలులు
అటునిటు ఊగిసలాడు లతలు
ఒలికించు వయ్యారాలు
కలిగించు కమ్మదనాలు

పవనముతోకలసి పయనించి
పరిమళాలు మత్తెక్కించు
పరమానందము కలిగించు
ప్రేమాభిమానాలను పూలుపెంచు

మాలలుగ అల్లబడి
కోమలుల కొప్పులెక్కి
అతివలకు అలంకారమయి
ఆక్రమించు అత్యున్నతస్థానమును అరులు

దేవుని మెడన దండలయి
దేవేరులకు ప్రీతిపాత్రమయి
దేవుళ్ళ పాదాలచేరి పరవశించి
దైవపూజలందు పాల్గొని పొంగిపోవు పూలు

కళ్యాణమండపాలను
కళకళలాడించు
కాంతులతో కలసివెలుగు
కళ్ళను కట్టిపడవేయు కుసుమాలు

సుమాల సొగసు
హాయిని కొలుపు
హృదిన నిలుచు
దోచును మనసు

పువ్వుల పొంకము
చూపరులకు చోద్యము
ప్రకృతికి వరము
ప్రతిక్షణము ప్రసన్నము

వికసించిన విరులు
విభిన్న రూపములందు
వివిధ వర్ణములందు
విరజిమ్ము వింతఅందాలు

పువ్వుల సౌందర్యము
పుట్టించు ఆనందము
పెంచు అనురాగము
పొంగించు హృదయము

పువ్వుల కదంబాన్ని
చూడండి
పువ్వులకు జోహారులను
సమర్పించండి

గుండ్లపల్లి రాజేంద్రప్రసాద్, భాగ్యనగరం