పువ్వును నేను పూలకవివి నువ్వు
(తపస్వి మనోహరం అంతర్జాల తెలుగు సాహిత్య పత్రిక)
రచన: గుండ్లపల్లి రాజేంద్రప్రసాద్
పువ్వును నేను
పరిహాసమును నేను
పడుచును నేను
పొంకమును నేను
ప్రేమను పంచుతా
పరిమళాలు చల్లుతా
పరవశింపజేస్తా
ప్రక్కనుండి ప్రకాశిస్తా
అందుబాటుకొస్తా
అలరింపజేస్తా
అడిగినచోటుకు రమ్మంటే
ఆలస్యంలేకుండా పరుగెత్తుకుంటువస్తా
అన్యాయాలు ఎరుగను
అక్రమాలకు ఒడిగట్టను
అవినీతి అసలే తెలియదు
అడిగినవి దాచుకోను
అమ్మను వదులుతా
అత్మీయులను విడుస్తా
అరుల స్నేహాన్ని వదులుకుంటా
అందుకుంటా నీ స్నేహహస్తాన్ని
అందాలు చూపిస్తా
ఆనందం కలిగిస్తా
అంతరంగాన్ని పంచుకుంటా
అత్మీయరాలు నవుతా
నేను ఉన్న ఒక్కరోజు
నీతోనే ఉంటా
నీ కోసమే
నాప్రాణాని అర్పిస్తా
ఓ కవివర్యా
ఒక రేయిని పంచు
ఒక కవితను రాయి
ఒక వెలుగును వెలుగు
మరునాడు నీ ఇష్టం
మరో పువ్వును పిలువు
మరోలోకములో విహరించు
మహదానందమును పొందు
మానవుడవు నీవు
మానవత్వముంది నీకు
మనసున్నవాడివి నీవు
మహాఙ్ఞానివి నీవు
పూల బాషను తెలిసినవాడవు
పూల మనసులు ఎరిగినవాడవు
పువ్వుల కవివి నీవు
పూలలోకంలొ విహరించు
(ఇక్కడ పరిహాసము అంటే నవ్వు అని అర్ధముగా అన్వయించుకొనవలసినది. పొంకము అంటే అందముగా అర్ధముజేసుకొనవలసినది)