అంతా కవితమయం
(తపస్వి మనోహరం అంతర్జాల తెలుగు సాహిత్య పత్రిక)
రచన: గుండ్లపల్లి రాజేంద్రప్రసాద్
కనులు తెరచినా కవితాయె
కనులు మూసినా కవితాయె
కళ్ళముందుకు కధలొచ్చె
కలలలోకి కధలొచ్చె
కనులముందుకు అందాలొచ్చె
కనులకు విందులుచేసే
కలము చేతపట్టమనె
కవితలను వ్రాయమనె
కలలోకి కవితలొచ్చె
కవ్వించి పోయె
కధనిచ్చి పోయె
కవితలను కూర్చమనె
పువ్వులు ఎదురుగావచ్చె
పరమానందం కలిగించె
పరిమళాలు వెదజల్లె
పుష్పకవితలను రాయమనె
చెలి చెంతకొచ్చె
చిరునవ్వులు చిందించె
చేతిలో చెయ్యేసె
చక్కనికవితలు చేపట్టమనె
చందమామ వెన్నెలకురిపించె
చల్లని గాలినివీచె
చిత్తమున ఆలోచనలు పారించె
చిత్రవిచిత్ర కవితలు అల్లమనె
పసిపాపలు ఎత్తుకోనమని చేతులెత్తె
పిల్లలు ముద్దుమాటలు పలికె
పసివారు అందచందాలను చూపె
పలుకవితలు వెలువరించాలనిపించె
ప్రకృతి అందాలు పులకించె
ప్రకృతికన్య పరవశమిచ్చె
ప్రకృతినివర్ణించమని ప్రోత్సహించె
పలుకవితలను పారించమనె
ఏది చూచినా కవిత కనిపించె
ఏది చదివినా కవిత అగుపించె
ఏది విన్నా కవిత తలపుకొచ్చె
ఎచటకెళ్ళినా కవిత పలుకరించె
కవితలను వదలను
కవనాన్ని మానను
కైతలను పంపుతాను
కదలిస్తా కరిగిస్తా పాఠకులను