అమ్మకు అక్షర మాలిక
రచయిత :: మక్కువ అరుణ కుమారి
అ పురూప జన్మనిచ్చిన అమృతవర్షిణి
ఆ యువునొడ్డి ఆయువు పోసిన అపరబ్రహ్మణి
ఇ లలో వెలిసిన ఇంతి
ఈ-ప్సితాలు ఈడేర్చే పూబంతి
ఉ న్నతిని కాంక్షించే కాంత
ఊ హాలోకాన్ని కళ్ళెదుటే ఆవిష్కరించే వనిత
ఋ ణం తీర్చుకోలేని బంధం
ౠ(రూ)కలతో కొనలేని అనుబంధం
ఎ న్ని కడగండ్లకైనా ఎదురెళ్ళే ధీరత
ఏ మిలేని చోట కూడా అన్నీఉన్నట్లు చూపే సంపూర్ణత
ఐ నవారి అండలేకున్నా చెక్కు చెదరని గంభీరత
ఒ డినే బడిగాచేసి బతుకు పాఠాలు నేర్పే సమర్ధత
ఓ టమి నెపుడూ ఆమడదూరం తరిమే సంకల్పత
ఔ న్నత్యాన్ని పెంపొందించే ఉదాత్తత
అం దరిలో పాదుకొల్పేటట్లు తీర్చి దిద్దిన మాతృమూర్తి
అంతఃకరణశుద్ధిగా నీవేగా నాకు నిరంతర స్ఫూర్తి
