బాబోయ్ ఇరికించేసాడు……
రచన: రాయల అనీల
“కస్తూరి….కస్తూరి “
” చిరాగ్గా ఉంది….. ఏమి తోచడంలేదు”
” ఏం చేయమంటారు నన్ను…… పోనీ అక్కడ ఆ నవలలు ఉన్నాయిగా వాటిల్లో ఒకటి తీసి చదుకోండి”
” అవా …..అవి ఇప్పుడు చదవాలని లేదు “
” ఇంకేంటి మరి”
” అది నాకు…. ఏమి లేదులే “
” అయితే కాసేపు అలా బయటకు వెళ్ళండి…… వాకింగ్ కి “
” సర్లే ” అని బయటకు రాగానే నా తాత( మనవడు) ఎదురొచ్చాడు
” తాతయ్య….తాతయ్య మరే “
” ఏంటి తాత ….. చెప్పు”
” నీకేం కావాలో నాకు తెలుసులే”
” నాకా ….నాకేం కావాలిరా ….. నాకేం వద్దు”
” నీకేందుకు చిరాగ్గా వుందో నాకు తెలుసులే ….. ఉదయం అమ్మ చేసిన లడ్డూలు నువ్వు తినకూడదని ….. నాన్న అన్నారనేగా”
” అవునురా తాత…. అయినా ఏం చేస్తాం ఈ మాయదారి రోగం వచ్చిన దగ్గరనుండి అది తినకూడదు, ఇది తినకూడదు అని నా సగం తిండి తగ్గించేసాడు మీ నాన్న ఆ డాక్టర్ ఎవరో చెప్పారని ……… వాడు చెప్పెది కూడా నా ఆరోగ్యం కోసమేలే …… అయినా కూడా అప్పుడప్పుడు ఆ లడ్డూలు చూస్తే నా మనసటే లాగుతా ఉంటది…… “
“నాకు తెలుసు తాతయ్య….అందుకే నీ కోసం లడ్డు తెచ్చా ఇదిగో “
” మరి మీ నాన్న చూస్తే “
” అప్పుడు చూసుకుందాంలే…… ముందు తిను తాతయ్య ” అని ఒక చేతిలోది నాకు ఇచ్చి మరో చేతిలోది వాడు తింటుంటే
” అరే నువ్వు కూడా తింటున్నావా…… ఇందాకే కదరా అన్ని తిన్నావ్”
” అయితే ఏంటి ఇప్పుడు…. నువ్వు లడ్డు తింటున్నావని నాన్నకి చెప్పనా”
” ఓరి బడవా నన్నే బెదిరిస్తున్నావా ….సరేలే తిను” ఎన్ని రోజులకి తింటున్నాను….. అబ్బా ఎంత బాగుంది రా…..ఆహా
” నాన్నా……” వామ్మో నా పుత్ర రత్నం చూసేసాడా …. ఇప్పుడెం అంటాడో …… పాపం నా వల్ల వీడికి కూడా అక్షింతలు పడతాయో ఏంటో…..
” ఏంటి నాన్న…. మీకేన్ని సార్లు చెప్పాలి…… మీకు డయాబెటిస్ స్వీట్స్ తినకూడదు అని….. పైగా వాడితో కలిసి తింటున్నారా”
” అది….అది కాదురా….. అసలేం జరిగిందంటే”
” అవును డాడీ….. నేను కూడా చెప్పాను తాతయ్యకి స్వీట్స్ తినకూడదు అని….. నా మాట వినలేదు పైగా నన్ను కూడా తినమన్నాడు…… నేను తినకపోతే నేనే తెచ్చి తినమన్నానని …… నీకు చెబుతా అని బెదిరించారు డాడీ “
” అయ్యో బాబోయ్ ఇరికించేసాడు వెధవ …… వీడిని ఎలా కాపాడాలి అని నేను ఆలోచిస్తుంటే నన్నే ఇరికించాడు వెధవ”
” మాట్లాడరేం….. నాన్న “
” అబ్బా….మీరు ఉండండి మావయ్య గారెం కావాలని తినలేదు…….. నా దగ్గర నుంచి మన బన్నీ గాడే తీసుకెళ్లాడు”
” నువ్వెందుకు ఇచ్చావ్ వాడికి “
” ఇది మరీ బావుంది…… మీరు తెమ్మన్నారని నాకు చెప్పి తీసుకెళ్లాడు “
అమ్మా కోడలా బ్రతికించావమ్మ అని కోడలికి మనసులోనే థ్యాంక్స్ చెప్పుకోని …….. ఇక అక్కడ ఉండడం మంచిది కాదని మెల్లగా వాకింగ్ అని చెప్పి జారుకున్నా…… ఈ బన్నీ గాడు ఇరికిస్తే ఇరికిచ్చాడు గానీ ఒక మంచి లడ్డు ఇచ్చాడు ……. హమ్మయ్య ఇప్పుడు బాగుంది నాకు…..
***