నేటి భారతం
రచన: వాడపర్తి వెంకటరమణ
ఒడలుపులకించే నినాదాలు
ఆ ప్రదేశమంతా పులుముకుని
హోరాహోరీగా హోరెత్తుతాయి
విచ్చుకున్న వాగ్ధానాల చిట్టా
ఆ గుడెసెల కాగింతంపై
నమ్మకంగా లిఖించబడతాయి
పచ్చనోట్లకు రెక్కలొచ్చి
ప్రేమగా గూడెంలోని గుడిసె చూర్లకు
గబ్బిలాల్లా వ్రేలాడుతుంటాయి
లిక్కరు చుక్కలకు ఉత్సాహమొచ్చి
వాకిళ్ళలో మత్తుగా ముగ్గులేస్తూ
ఉధృతంగా ప్రవహిస్తుంటాయి
ఇన్నాళ్లూ పక్కపక్కన కూర్చున్న
స్నేహపూర్వక మాటలిప్పుడు
ఏ బ్రహ్మ రాక్షసుడో శపించినట్లు
ద్వేషపూరిత కాగితంలో పొట్లంచుట్టి
వైరివనంలోకి విసిరేయబడతాయి
ఇచ్చిన హామీల వర్షం కురవక
ఆశల చట్రంలో బతుకుతున్న పక్షి
మరో అయిదేళ్లు ఎదురుచూస్తుంది
ఎక్కడ వేసిన బతుకుగొంగళి
దీనంగా చూస్తుంటుంది అక్కడే
ఇదంతా నేటి భారతంలో
షరా మామూలే!