విశ్వరూప సందర్శన యోగం
(తపస్విమనోహరం అంతర్జాల తెలుగు సాహిత్య పత్రిక)
రచన: ముద్దు వెంకటలక్ష్మి
పంచభూతాల గతానుగతగమనాలు పంచేంద్రియాల దివ్యానుభవాలు,
ఊహాచిత్రాల సుందర విహారాలు
లోకానుభవ సాక్షాత్కారాలు
సామాజిక సత్యాల ఘోషణలు, ధర్మాధర్మాల విశ్లేషణలు,
జీవన రహదారుల ఎత్తుపల్లాలు,
జీవితాల లోని ఒడిదుడుకులు ,
కుటుంబ సంబంధాల ఊగిసలాటలు
ప్రపంచ సంఘటనల సంవేదనలు,
లలితకళలూ వ్యవహార కళల
వివిధ లయగతులు,
నవరసభావాల వెల్లువలు ,
పిపీలికాది బ్రహ్మ పర్యంత వర్ణనలు
నానా విధ అలంకారాలు,
అక్షరాల చిత్రవిచిత్ర విన్యాసాలు,
మనోహర పద విన్యాసాలు,
నిత్యస్మరణీయ ఉల్లేఖనాలు
సాహిత్య సమూహాల్లో
కవుల కలాల నుండి నిత్యం
సందోహంగా సముద్భవిస్తున్న
సంపూర్ణ తెలుగు కవిత్వం
విశ్వరూప సందర్శన యోగం.