ఆరోగ్యమే మహాభాగ్యం
(తపస్వి మనోహరం అంతర్జాల తెలుగు సాహిత్య పత్రిక)
రచన: యర్రాబత్తిన మునీంద్ర(చైత్రశ్రీ)
ఆరోగ్యమంటే శారీరకంగానే కాదు మానసికంగా కూడా దృఢంగా ఉండడం. ప్రతిరోజూ వ్యక్తిగతంగా ఎవరికివారు పరిశుభ్రతను పాటించడం మన శరీరం సురక్షితంగా ఉండడానికి ముఖ్య సూత్రం. మీరు ఆఫీసు లేదా వర్క్ ప్లేస్ లో పనిచేసే వారైతే ప్రతిరోజూ ఉదయం డెస్క్ను లేదా పనిముట్లను శానిటైజ్ చేయకపోవచ్చు. కానీ మీ చేతులను తరచుగా శుభ్రపరచుకోవాలి. మీరు కార్యాలయం లేదా కర్మాగారంలోకి ప్రవేశించిన వెంటనే మరియు వాష్రూమ్ని ఉపయోగించిన తర్వాత సబ్బు మరియు నీటితో మీ చేతులను కడగడం ఎల్లప్పుడూ మంచిది.
మన చుట్టూ ఉన్న పరిసరాలలోనే కాక, కడుక్కోని చేతులపై కూడా మనం చూడలేని మిలియన్ల కొద్దీ సూక్ష్మక్రిములు ఉంటాయి. మీ చేతులను సబ్బుతో స్క్రబ్ చేసి, చేతులను సరిగ్గా ఆరబెట్టుకోవాలి. మీరు తుమ్మినా లేదా దగ్గు వచ్చినా, మీ ముక్కు మరియు నోటిని కప్పుకోవడం ఎల్లప్పుడూ గుర్తించుకోండి. ఇది ఆఫీస్లో లేదా కర్మాగారంలో క్రిములు వ్యాపించకుండా చేస్తుంది. మీరు టిష్యూని ఉపయోగిస్తుంటే, వెంటనే దానిని డస్ట్బిన్లో విసిరినట్లు నిర్ధారించుకోండి. కాలానుగుణ అలెర్జీలు మరియు జలుబులు మందులు లేదా పడక విశ్రాంతి అవసరం అనిపించేలా తీవ్రంగా ఉండకపోవచ్చు. అయినా సరే ఆఫీసు లేదా కర్మాగారంలోని తోటి ఉద్యోగుల రక్షణ కోసం ఆరోగ్య చిట్కాలు ఉపయోగిస్తూ మాస్క్ ధరిస్తే మంచిది. ఎందుకంటే మీరు కార్యాలయానికి వచ్చినప్పుడు మీ సహోద్యోగులకు ఇన్ఫెక్షన్ వ్యాపించే అవకాశం ఉంది. సీజనల్ వ్యాధులు గాలి ద్వారా ఒకరినుంచి ఒకరికి వ్యాప్తి చెందడంలో ముందుంటాయి. మీకు ఎటువంటి నలత లేనప్పటికీ అలాంటి వాతావరణంలో మీరు ఉన్నప్పుడు మీ రోగనిరోధక శక్తి తగ్గిపోతుంది. అందువల్ల రకరకాల రోగాలు అంటుకొనే ప్రమాదముంది. మీరు వాడే వస్తువులను చిందర వందరగా లేకుండా ఒక క్రమ పద్ధతిలో ఉంచుకోండి. అది కూడా మీ వ్యక్తిగతమైన ఆలోచనా సరళిని ప్రతిబింబిస్తుంది.
మీ శారీరక ఆరోగ్యం గురించి మాత్రమే కాదు, మీ మానసిక ఆరోగ్యం గురించి కూడా మీరు ఆలోచించాలి. మీ పని విరామ సమయంలో కాసేపు నడకకు వెళ్లడం వల్ల గుండె జబ్బులు, ఊబకాయం, డిప్రెషన్ మొదలైన సమస్యల ప్రభావాన్ని తగ్గిస్తుంది. ఎక్కువగా నీరు తాగండి. అప్పుడప్పుడూ ముఖాన్ని చల్లని నీటితో కడుక్కోండి. నీరు మనం పని చేసినప్పుడు మన చర్మంపై చేరిన దుమ్మూ ధూళిలను శుభ్రం చేస్తుంది. సమూహాలుగా పనిలో నిమగ్నమైనప్పుడు ఒక్కరు పొరపాటు చేసినా మొత్తం సమూహమే ఇబ్బందుల్లో చిక్కుకోవలసి వస్తుంది. అందుచేత ఎప్పుడూ అజాగ్రత్తగా ఉండరాదు. చెడు వ్యసనాలకు దూరంగా ఉండడం చాలా ముఖ్యం. మన పనిని ఒక బాధ్యతగా భావించాలి. అష్టైశ్వర్యాల కంటే ఆరోగ్యమే చాలా విలువైనది అందుకే అన్నారు పెద్దలు ఆరోగ్యమే మహాభాగ్యమని. కాబట్టి ఎవరికి వారే వ్యక్తిగతంగా పరిశుభ్రతను పాటిస్తే అనారోగ్యం కలగకుండా ఎల్లప్పుడూ ఆరోగ్యంగా ఉంటాం. చిన్న, చిన్న చిట్కాలు పాటించడం వల్ల మీతో పాటూ మీ సహోద్యోగుల ఆరోగ్యాలను కాపాడిన వారవుతారు.