ఇంటి దీపం
రచన :: సావిత్రి కోవూరు
మా వలపు పంట గా మా ఇంట చేరే – మహాలక్ష్మి కి మారు మా చిట్టి తల్లి,
గుండెల్లో పెట్టుకుని పెంచుకున్నాము – అరచేతిలో ఉంచి నడిపించుకున్నాము,
అలరించ వచ్చింది అందాల భరిణ – నట్టింట తిరిగితే నయనాల విందే,
తాను నవ్విందంటే వెన్నెల్ల పంట – కన్ను కదిపిందంటే కరుణాల జల్లే,
మాటలాడిందంటే మమతల మరుమల్లె – కాలు కదిపిందంటే హంసలా నడకల్లె,
తాను చూసిందంటే కాంతులే పండు – నిండు పున్నమి నాటి వెన్నెలే మాకు,
ఎన్నాళ్ళ పుణ్యమో మా ఇంట వెలసిన – అన్నుల మిన్నైన మా అపరంజి బొమ్మా,
తల్లికే తల్లైన తనయ తానమ్మా – తండ్రి కన్ను పాపయ్యి తాను వెలిసింది,
మా అదృష్ట దేవతే ఈ పుత్తడి బొమ్మ – తల్లి దండ్రులంటే తగని ప్రేమమ్మా
ఏ రోజు మా మాట లేదు జవదాటలేదు – పలు విద్యలలోనూ ఆరితేరింది,
పుడమికి ఉన్నంత ఓర్పు గల తల్లి – సుగుణాల గంధాలు వెదజల్లు మల్లి,
రాముడంతటివాణ్ణి వెదకి తెచ్చాము – రాణిలా చూచు నని మదిని తలిచాము,
కన్నులపండుగగా కళ్యాణమొనరించి – కన్నీళ్లు ఆపుకొని అప్పగించాము,
కన్ను పాప లాగా కాచుకోండి మీరు – మా కన్నుపాపను అప్పగించాము,
మీ వంశాన్ని పెంచగా అరుదెంచెనమ్మా – మమతలా మ్రానై చిగురించునమ్మా,
మీ ఇంటి దీపమై వెలుగులు నింపుతూ – కొలువుదీరాలని కోరి పంపాము.
ప్రతి తల్లిదండ్రుల మనసును ఆవిష్కరించారు
👌👌💐💐💐💐💐💐💐💐