నడి ఈడు పెళ్లికి ప్రకృతి మంతనాలు
రచన: పావని చిలువేరు
ఎంత సక్కగున్నావే
నా ముసలి పడుచు పిల్లదాన ,
అప్పుడే చిగురించిన మొక్క ఓలే
పాలుగారే ఈడు లోనే,
ఏధో ఎత్తిపోయినట్టు
నా గుండె చేరితివి.
గలగల పారే సెలయేరు లాంటి నీనవ్వుతో,
కష్ట సుఖాలలో ఓలలాడుతూ,
చేయి చేయి పట్టుకొని,
సంసార సాగరాన్ని అవలీలగా
ప్రేమతో ముడి వేసుకొని ,
50వ వసంతాలలో అడుగిడితిమీ .
ఎంతటి ఆశ్చర్యం
ఈ ఏల పెరటిలోని సన్నివేశం అబ్బురపరిచే.
భలే…ప్రకృతి మన పెళ్లికి
మంతనాలు చేస్తున్నట్టు గోచరించే .
అరిటాకు పందిరి కింద
నా బొండు మల్లె కోమలాంగి …..
నిన్ను చూసి ఈ నడి వయస్సున మళ్లీ సిగ్గుపుట్టే .
నిండు సందమామా ఓలే బోసి నవ్వుతో
పండు వెన్నెలై మళ్లీ నా చేతిలో వాలిపోతివి .
ప్రకృతి తోడుగా
అర్ధ శతాబ్దపు మన పెళ్ళికి
నలుగు రుద్ధి, మంగళ స్నానాలు చేయించడానికి
సరిగంగ పయణమైoది .
పంచభూతముల సాక్షిగా
జడి వానకి ముందు తొలకరి జల్లులు ,
మరియు
పడి ఎలిసిన వాన లో మిగిలిన
తుప్పర చినుకు లిరువురు అక్షింతలైరి .
పుస్తె కట్టే సమయాన పెళ్లికూతురుగా
మళ్లీ నా మీద కూసున్న తీరు గుర్తువచ్చి
మురిసి పోతిని .
తీగలా నన్ను చుట్టి గిలిగింతలు పెడుతున్న
లాలపోసి జోలపాడిన నీ చేతులను పెనవేసుకొని
నూరేల్ల మన పెళ్ళిరోజు కోసం
కళ్లల్లో వొత్తులేసుకొని ఎదురు చూస్తూఉంటా.
***